Komisioni Europian ka mbyllur hetimin e brendshëm në lidhje me një rrjet të dyshuar spiunazhi hungarez në Bruksel, duke liruar nga çdo akuzë ish-komisionerin hungarez Olivér Várhelyi.
Sipas njoftimit zyrtar, hetimi nuk gjeti prova që të implikonin personalisht Várhelyin apo ndonjë anëtar tjetër të stafit të Komisionit Evropian në aktivitetet e dyshuara të inteligjencës.
Çështja lidhet me raportime të publikuara në tetor, sipas të cilave Përfaqësia e Përhershme e Hungarisë në Bashkimin Europian kishte drejtuar një rrjet oficerësh inteligjence. Këta paraqiteshin si diplomatë dhe kishin në shënjestër stafin hungarez të institucioneve europiane gjatë periudhës 2012-2018. Operativët kërkonin informacione sensitive në lidhje me Hungarinë dhe përpiqeshin të rekrutonin zyrtarë hungarezë të BE-së.
Zëdhënësi i Komisionit Evropian, Balázs Ujvári, deklaroi se hetimi nuk gjeti prova që ndonjë zyrtar të ishte rekrutuar me sukses. Ai shtoi se, bazuar në informacionin e mbledhur, nuk ishte e mundur të përcaktohej përgjegjësi individuale përtej oficerëve të inteligjencës të përfshirë.
Várhelyi ishte përfshirë në hetim pasi kishte shërbyer si ambasador i Hungarisë në BE nga viti 2015 deri në 2019, periudhë që përkonte pjesërisht me aktivitetet e dyshuara. Më pas ai u emërua komisioner europian nga ish-kryeministri hungarez Viktor Orbán.
Vetë Várhelyi kishte mohuar çdo dijeni për rrjetin e dyshuar të spiunazhit. Sipas mediave, ai i kishte deklaruar presidentes së Komisionit Evropian, Ursula von der Leyen, se nuk kishte informacion për aktivitete të tilla.
Vendimi i Komisionit vjen një ditë para marrjes së detyrës nga kryeministri i ri hungarez Péter Magyar, pas fitores në zgjedhjet e muajit të kaluar.
Marrëdhëniet mes Budapestit dhe Brukselit kanë qenë të tensionuara prej vitesh për shkak të mosmarrëveshjeve mbi sundimin e ligjit, demokracinë dhe lirinë e medias në Hungari.
Përditësime
Olivér Várhelyi mund të mbetet Komisioner i BE-së për Shëndetin dhe Mirëqenien e Kafshëve.