Komisioni për të drejtat e njeriut, barazi gjinore, punë, familje, vlerat e luftës çlirimtare dhe peticione miratoi mes dy leximeve Projektligjin për buxhetin e vitit 2026.
Pro projektligjit votuan gjashtë deputetë të mazhorancës, ndërsa kundër votuan katër deputetë nga opozita.
Propozimi për pensionet
Debat në komision ngriti propozimi i deputetes së PDK-së, Sala Jashari, që pensionet e disa kategorive, përfshirë veteranët, të barazohen me pagën minimale. Deputetët e LVV-së thanë se këto propozime do të shqyrtohen gjatë rishikimit të buxhetit muajin e ardhshëm.
Kërkesa për vizitë në Hagë
Deputeti i PDK-së, Artan Behrami, kërkoi nga komisioni të shqyrtojë mundësinë e një vizite në Hagë te ish-krerët e UÇK-së që po gjykohen nga Specialja. Ai propozoi të thirren edhe ish-pjesëmarrës në procese të ngjashme për të dhënë përshtypjet e tyre mbi mosrespektimin e të drejtave të njeriut nga gjykata speciale.
Kuvendi i Kosovës miratoi të hënën buxhetin në lexim të parë, ndërsa të premten pritet votimi në lexim të dytë.