Komisioni për Buxhet, Punë dhe Transfere nuk e mbështeti më 21 tetor amendamentin për ndarjen e një milion eurove për pajisje, proteza dhe mjete të tjera mjekësore për invalidët e luftës. Propozimi, i paraqitur nga Komisioni për Mirëqenie Sociale, Punë, Familje, Vlerat e Luftës Çlirimtare, Viktimat e Dhunës Seksuale të Luftës dhe Personat e Pagjetur, mori pesë vota për, asnjë kundër dhe pesë abstenime gjatë shqyrtimit të projektligjit për ndryshimin dhe plotësimin e ndarjeve buxhetore për vitin 2026.
Kryetari i komisionit, Enver Haliti, tha se amendamenti parashihte shtimin e një milion eurove për pajisje dhe proteza për invalidët e luftës. Ministri i Financave, Hekuran Murati, kundërshtoi propozimin, duke thënë se mbulimi i këtyre shpenzimeve është rregulluar me një udhëzim administrativ të Ministrisë së Shëndetësisë, të miratuar në mars të vitit 2024, dhe bëhet përmes Fondit të Sigurimeve Shëndetësore.
Haliti tha se, sipas informatave të marra nga Ministria e Shëndetësisë, në vitin 2024 janë nxjerrë dy vendime për invalidët e luftës së UÇK-së dhe invalidët civilë të luftës. Vendimet mundësojnë mbulimin financiar të ndërrimit, mirëmbajtjes dhe vendosjes së protezave, sipas kërkesave individuale. Sipas tij, nga këto vendime kanë përfituar 103 persona: 58 invalidë të luftës së UÇK-së dhe 45 invalidë civilë të luftës. Ai tha se kërkesat për mbulim ishin zgjidhur, me përjashtim të një rasti që ishte ende në shqyrtim.
Deputeti i PDK-së, Mergim Lushtaku, mbështeti amendamentin dhe tha se invalidët e luftës vazhdojnë të ankohen për mbulimin e shpenzimeve të protezave. Edhe deputetja e Aleancës, Teuta Haxhiu, e vlerësoi të nevojshëm propozimin, duke thënë se disa invalidë janë mbështetur te miqtë dhe bashkatdhetarët në diasporë për sigurimin ose ndërrimin e protezave.
Deputeti i LDK-së, Avdullah Hoti, tha se e mbështet amendamentin, por kërkoi që çështja të zgjidhet në mënyrë të qëndrueshme, duke përfshirë shpenzimet në buxhetin e rregullt të Klinikës së Ortopedisë në QKUK. Sipas tij, kujdesi për këtë kategori nuk duhet të varet nga amendamente të veçanta ose vendime të ekzekutivit.