Komiteti i Arbitrave në Spanjë ka konfirmuar vendimin e gjyqtarit José Luis Munuera Montero për t’i dhënë karton të kuq mesfushorit të Real Madrid-it, Federico Valverde, gjatë ndeshjes së fundit kundër Atlético Madrid-it në La Liga.
Organi përgjegjës për arbitrat analizoi rastin dhe arriti në përfundimin se përjashtimi ishte në përputhje me rregullat. Gjyqtari e interpretoi ndërhyrjen si goditje ndaj kundërshtarit në një moment kur topi nuk ishte në distancë loje, me përdorim force të tepruar. Zyrtari i VAR-it, Trujillo Suárez, nuk ndërhyri pas shqyrtimit të incidentit nga disa kënde, pasi pika e kontaktit dhe intensiteti i veprimit përputheshin me një ndërhyrje të rëndë.
Komiteti mbështeti plotësisht vendimet e marra në fushë dhe nga VAR-i, duke hedhur poshtë ankesat e të dy klubeve. Ky vendim pritet të mbyllë debatet e hapura pas ndeshjes rreth ashpërsisë së ndërhyrjes dhe korrektësisë së vendimit.
Pas këtij kartoni të kuq, Valverde do t’i humbasë dy ndeshjet e ardhshme të Real Madrid-it: atë si mysafir kundër Mallorcës dhe si vendas kundër Gironës.