Komuna e Prishtinës ka njoftuar shtimin e nisjeve në linjën 1A, që lidh Aeroportin Ndërkombëtar Adem Jashari me Prishtinën dhe anasjelltas, për shkak të ndeshjes play-off Kosovë-Turqi për kualifikim në Kupën e Botës.
Ndeshja zhvillohet të martën në stadiumin Fadil Vokrri në kryeqytet. Për të përballuar rritjen e kërkesës për qarkullim, Komuna, në bashkëpunim me Trafikun Urban, ka parashikuar nisje shtesë më 31 mars dhe 1 prill.
Nisjet do të realizohen çdo një orë, nga ora 06:00 deri në 24:00, si nga aeroporti ashtu edhe nga Stacioni i Autobusëve në Prishtinë. Kjo masë synon të lehtësojë lëvizjen e qytetarëve drejt dhe nga ndeshja.