Komuniteti shqiptar në Texas mbajti të hënën një protestë para Kapitolit të shtetit në Austin, për të shprehur kundërshtimin ndaj vendimit të Dhomave të Specializuara të Kosovës lidhur me ish-krerët e Ushtrisë Çlirimtare të Kosovës. Pjesëmarrësit, të cilët mbajtën flamuj të ShBA-ve, Kosovës dhe Shqipërisë, u bashkuan nën thirrjet për drejtësi dhe mbështetje për luftën e UÇK-së. Përmes pankartave si “Not in My Name” dhe “Freedom Has a Name: UÇK”, protestuesit kërkuan të reflektojnë kontributin e luftës për lirinë e Kosovës dhe të shprehin pakënaqësinë ndaj procesit gjyqësor në Hagë.
Organizatorët theksuan se ky komunitet, mjaft aktiv në jetën publike, kulturore dhe sociale të Texasit, kërkon drejtësi të paanshme. Gjatë tubimit, folësit kryesorë që përçuan mesazhet e protestës ishin Visar Visoka, Ekrem Hyseni, Nazar Mehmeti, Bruno Ceka, Ruzhdi Halili, Agim Halili dhe zëvendëskryetari i Bashkisë së Wylie, Gino Mulliqi.
Reagimi i Kongresistit
Lidhur me këtë proces, kongresisti amerikan nga Texas, Keith Self, deklaroi më 14 shtator shqetësimet e tij në lidhje me vendimmarrjen e institucioneve të drejtësisë. Në një postim në platformën X, ai shprehu shpresën që të mos ketë “anshmëri politike” në gjykimin ndaj Hashim Thaçit dhe tre bashkëluftëtarëve të tij, të cilët ai i cilësoi si civilë shqiptarë që luftuan për pavarësi pas viteve të shtypjes serbe.
Përditësime
Komuniteti shqiptar në Austin protestoi para Kapitolit të Texasit duke kërkuar drejtësi dhe mbështetje për ish-krerët e UÇK-së.