Një shtetase e huaj është diagnostikuar me malarie dhe po merr trajtim mjekësor në Klinikën Infektive të Qendrës Klinike Universitare të Kosovës (QKUK). Pacientja u pranua më 1 gusht në gjendje të rënduar shëndetësore, pa vetëdije dhe me parametra vitalë jashtë vlerave normale. Pas konfirmimit të diagnozës, si pasojë e udhëtimit të saj të fundit në zona endemike, ajo i është nënshtruar trajtimit specifik antimalarik. Sipas njoftimit nga QKUK, gjendja e pacientes është stabilizuar.
Infektologu dr. Visar Gashi ka sqaruar se malaria është sëmundje parazitare e rrezikshme që mund të çojë në fatalitet, sidomos në varësi të gjendjes imunitare dhe sëmundjeve kronike të të prekurit. Ai theksoi se të gjitha rastet e evidentuara në Kosovë janë të importuara, pasi lloji i mushkonjave që e transmetojnë parazitin nuk është i pranishëm në Evropë.
Diagnostikimi dhe trajtimi
Sipas mjekëve, dyshimi për malarie duhet të ngrihet veçanërisht te personat që vijnë nga zonat endemike, si ato afrikane dhe sub-sahariane, nëse shfaqin temperaturë që nuk i përgjigjet medikamenteve të zakonshme. Procesi i diagnostikimit në Kosovë përfshin:
- Testin rapid për konfirmim të menjëhershëm.
- Ekzaminimin e pikës së dendur dhe strishos periferike për identifikimin e llojit të parazitit.
Në rastet kur pacienti është klinikisht stabil, përdoret trajtimi antimalarik oral, ndërsa te pacientët në gjendje të rënduar, trajtimi kryhet me antimalarik intravenoz ose përmes infuzioneve.
Dr. Gashi u ka bërë thirrje udhëtarëve që planifikojnë të vizitojnë zona endemike të konsultohen me një infektolog për të vlerësuar nevojën për vaksinim ose marrjen e profilaksës, siç janë tabletat Malarone. Ai shprehu shpresën që këto procedura të rregullohen edhe me akte ligjore në të ardhmen, ashtu siç ndodh në shumë vende të tjera të botës.