Një konflikt fizik midis disa personave ka ndodhur ditën e sotme, më 8 shtator, në një lokal të tipit beach bar, të vendosur në zonën e Lungomares në qytetin e Vlorës. Sipas informacioneve paraprake, përplasja dyshohet se ka nisur për motive banale ose si një grindje e çastit, duke degraduar më pas në konflikt fizik midis palëve.
Pas njoftimit të marrë, shërbimet e Policisë së Vlorës kanë reaguar menjëherë duke mbërritur në zonën e Ujit të Ftohtë për të vënë situatën nën kontroll dhe për të rivendosur rendin. Si rrjedhojë e përplasjes, disa prej personave të përfshirë kanë pësuar dëmtime të lehta shëndetësore.
Aktualisht, autoritetet policore po punojnë për sqarimin e plotë të rrethanave të ngjarjes. Gjithashtu, policia vijon kërkimet për një prej shtetasve të përfshirë në këtë konflikt, i cili ende nuk është ndaluar.