Një ngjarje e dhunshme është regjistruar mbrëmjen e sotme në bulevardin "Ismail Qemali", në lagjen Lef Sallata të qytetit të Vlorës. Disa persona janë përfshirë në një konflikt fizik, duke përdorur grushte dhe sende të forta. Gjatë përplasjes, raportohet se është dëmtuar edhe një automjet i parkuar në afërsi të vendngjarjes.
Menjëherë pas njoftimit, forcat e Policisë kanë mbërritur në vendin e ngjarjes. Ndërhyrja e shpejtë e efektivëve bëri të mundur neutralizimin e situatës dhe parandalimin e përshkallëzimit të mëtejshëm të konfliktit. Të gjithë personat e përfshirë në këtë incident janë shoqëruar në komisariat, ku po merren në pyetje nga autoritetet për sqarimin e rrethanave të ngjarjes.
Aktualisht, situata është qetësuar, ndërsa uniformat blu po vijojnë veprimet procedurale dhe hetimet për zbardhjen e plotë të shkaqeve që çuan në këtë konflikt.