Një konflikt midis disa adoleshentëve në një lokal në lagjen Vullnetari të qytetit të Elbasanit ka degjeneruar në përdorimin e armëve të zjarrit. Sipas informacioneve paraprake, gjatë incidentit janë dëgjuar rreth 6 të shtëna.
Si pasojë e kësaj ngjarjeje, tre adoleshentë janë paraqitur për ndihmë mjekësore në Spitalin Rajonal të Elbasanit. Nga të dhënat e deritanishme, njëri prej tyre ka marrë plagë më serioze, ndërsa dy të tjerët kanë pësuar dëmtime të lehta, përkatësisht një gërvishtje në këmbë dhe një lëndim në krah.
Forca të shumta të Policisë së Elbasanit kanë mbërritur menjëherë në vendngjarje, kanë rrethuar zonën dhe kanë nisur hetimet për zbardhjen e rrethanave të plota të ngjarjes. Motivet e konfliktit mbeten ende të panjohura, ndërsa autoritetet po punojnë për identifikimin dhe kapjen e personave të përfshirë.