Në fshatin Bershi të Klosit, më 11 mars 2026, lindi një konflikt për pronën mes G. A., 62 vjeç, dhe Z. A., 65 vjeç. Sipas kallëzimit të Z. A., G. A. bllokoi rrugën me mjete bujqësore që çojnë drejt pronës së tij.
Specialistët për Hetimin e Krimeve në Stacionin e Policisë Klos referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Dibër. Aty nisi procedimi penal ndaj G. A. për kryerjen e veprës penale "vetëgjyqësia".
Në lidhje me të njëjtin rast, Dafina Alla, vajza e G. A., publikoi një video në rrjete sociale. Ajo pretendon se shërbimet e policisë e kanë dhunuar dhe kanë cenuar pronën e saj gjatë ndërhyrjes. Dafina Alla kërkon hetim të rastit nga autoritetet dhe mediat, duke u shprehur se është e gatshme të paraqesë prova.
Policia e Klosit reagoi duke sqaruar se efektivët ndërhynë për të parandaluar një konflikt fizik mes G. A. bashkë me familjen e tij dhe shtetasve Z. A. si dhe V. Sh., të cilët po grindeshin me fjalë. Uniformat blu theksojnë se në asnjë moment nuk kanë ushtruar dhunë.
Autoritetet lokale sqarojnë se për këtë konflikt pronësie kanë kryer disa veprime hetimore. Materialet për personat e përfshirë i kanë referuar më parë Prokurorisë Dibër. Për çdo rast kanë njoftuar dhe kërkuar ndërhyrjen e Bashkisë Klos.