Pas interesit të lartë publik të shkaktuar nga shpërndarja e një videoje në rrjetet sociale, e cila shfaqte dhunimin e një të miture, Drejtoria Vendore e Policisë Fier ka dhënë detaje mbi masat e ndërmarra. Ngjarja ka ndodhur më datë 8 qershor 2026, kur viktima, një 17-vjeçare, është paraqitur në Komisariatin e Policisë së bashku me nënën e saj për të kallëzuar rastin.
Sipas njoftimit zyrtar, e mitura ka deklaruar se është dhunuar dhe filmuar në banesën e shtetases L. L., 19 vjeçe, nga kjo e fundit dhe dy shtetase të tjera të moshës 15 vjeçe. Pas kallëzimit, strukturat policore kanë shoqëruar të dyshuarat, të cilat kanë pranuar ushtrimin e dhunës për motive të dobëta. Më datë 9 qershor 2026, materialet hetimore iu referuan Prokurorisë për veprën penale “Dëmtime të tjera me dashje”.
Policia konfirmoi gjithashtu se më datë 28 qershor 2026, specialistët për Hetimin e Krimeve kanë arrestuar njërën nga shtetaset 15-vjeçare të përfshira në këtë ngjarje. Arrestimi i saj është kryer pas një denoncimi të veçantë të bërë nga nëna e adoleshentes, e cila ka pretenduar se është dhunuar fizikisht nga e bija. Pas përfundimit të procedurave ligjore dhe vlerësimit nga autoritetet kompetente, 15-vjeçarja është dërguar për trajtim të specializuar mjekësor në një institucion të shëndetit mendor në Tiranë.
Përditësime
Prokuroria e Fierit ka nisur procedim penal ndaj tri vajzave për veprën penale 'Heqja e paligjshme e lirisë' në bashkëpunim. Sipas hetimeve paraprake, dhuna ndaj 17-vjeçares është motivuar nga xhelozia për partnerin e njërës prej të dyshuarave.