Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Fier, është finalizuar marrja e masave të sigurimit personal për tri shtetase të përfshira në ngjarjen e dhunës ndaj një 17-vjeçareje, pamjet e së cilës u shpërndanë në rrjetet sociale.
Sipas njoftimit zyrtar të organit të akuzës, të dyshuarat po hetohen për veprën penale “Heqja e paligjshme e lirisë”, parashikuar nga neni 110 i Kodit Penal, e kryer në bashkëpunim. Pas vlerësimit të provave të mbledhura në kuadër të procedimit penal nr. 1094 të vitit 2026, gjykata ka miratuar masat e kërkuara:
• L.L. - Arrest me burg;
• K.G. - Arrest në shtëpi;
• M.R. - Shtrim i përkohshëm në një institucion psikiatrik.
Prokuroria theksoi se hetimet janë përqendruar në identifikimin e personave të përfshirë dhe zbardhjen e dinamikës së ngjarjes. Në lidhje me rrjedhën e procedimit, organi i akuzës u bëri thirrje qytetarëve, mediave dhe administratorëve të faqeve në rrjetet sociale që të mos publikojnë ose shpërndajnë pamje e të dhëna që mund të çojnë në identifikimin e të miturve të përfshirë, duke respektuar privatësinë, dinjitetin dhe të drejtat e tyre ligjore.
Hetimet për rastin mbeten të hapura, ndërsa Prokuroria u zotua se do të njoftojë opinionin publik për zhvillimet e mëtejshme, për aq sa ky informacion nuk do të cenojë sekretin hetimor dhe garancitë procedurale të parashikuara nga ligji.
Përditësime
Gjykata e Fierit ka konfirmuar statusin ligjor të palëve në procedimin për dhunimin e 17-vjeçares. Institucionet kanë verifikuar se shtetaset K.G. dhe M.R. janë të mitura, ndërsa Prokuroria ka saktësuar se M.R. mban statusin e të miturës në konflikt me ligjin.