Shërbimet e Drejtorisë Vendore të Policisë Fier dhe të Komisariatit të Policisë Fier kanë identifikuar dhe vënë përpara përgjegjësisë ligjore dy shtetas, të cilët dyshohet se shkaktuan zjarre në toka bujqësore gjatë ditës së djeshme. Sipas njoftimit zyrtar, zjarret kishin për qëllim djegien e mbetjeve bimore, por për shkak të pakujdesisë flakët u përhapën me shpejtësi.
Ngjarjet shkaktuan dëme të konsiderueshme në sipërfaqe me ullinj, shkurre dhe bimësi të ndryshme, ndërsa u rrezikuan edhe banesat që ndodheshin në afërsi. I arrestuari, shtetasi Sh. Sh., 58 vjeç, u kap në flagrancë pranë vatrës së zjarrit në një tokë që e kishte marrë me qira. Gjatë procesit të shoqërimit për në ambientet e policisë, ai ka kundërshtuar punonjësit e policisë.
Ndërkohë, ndaj shtetases F. P., 78 vjeçe, ka filluar procedimi penal në gjendje të lirë. Ajo u konstatua nga policia pranë një zjarri të ndezur në afërsi të banesës së saj në fshatin Fermë Rroms. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për hetime të mëtejshme.