Strukturat e Komisariatit të Policisë Fier, në bashkëpunim me Drejtorinë Vendore të Policisë Fier, kanë identifikuar tre persona si autorë të dyshuar për ndezjen e disa vatrave të zjarrit në territorin e qarkut. Pas hetimeve, u bë e mundur arrestimi i dy shtetasve, ndërsa i treti po ndiqet penalisht në gjendje të lirë.
Sipas njoftimit zyrtar, të arrestuarit janë Pëllumb Zgurati, 66 vjeç, i dyshuar për zjarrvënie në fshatin Ade, dhe Durim Kapaj, 62 vjeç, i dyshuar për zjarrvënie në fshatin Kashisht. Ndërkaq, Dorian Muhametaj, 35 vjeç, është proceduar penalisht në gjendje të lirë si autor i dyshuar i zjarrvënies në fshatin Drizë.
Nga hetimet paraprake rezulton se përhapja e flakëve ka shkaktuar dëme në sipërfaqe të pyllëzuara, toka bujqësore, pemë frutore dhe ullishte. Përveç dëmeve mjedisore, zjarret kanë krijuar rrezik për banesat dhe objektet e ndodhura pranë zonave të përfshira nga flakët, veçanërisht në zonën e Drizës dhe të Apolonisë.
Materialet procedurale lidhur me këto raste i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, e cila do të vijojë me veprimet e mëtejshme. Çdo person i përfshirë në këtë procedim prezumohet i pafajshëm deri në vërtetimin e fajësisë me vendim gjyqësor të formës së prerë.