Këshilli për Marrëdhëniet Shqiptaro-Amerikane (AARC) zhvilloi një takim të rëndësishëm me kongresmenin amerikan nga New Yorku, Gregory Meeks, anëtar i lartë i pakicës në Komitetin për Punë të Jashtme të Dhomës së Përfaqësuesve. Diskutimet u përqendruan në forcimin e partneritetit strategjik, mbështetjen për integrimin euroatlantik të rajonit dhe fuqizimin e Kaukusit të Çështjeve Shqiptare në Kongresin amerikan. Meeks theksoi angazhimin e tij të gjatë për Kosovën, duke rikujtuar rolin e tij që nga administrata e presidentit Bill Clinton dhe përpjekjet e vendosura amerikane për të ndalur spastrimin etnik në atë periudhë.
Lidhur me situatën aktuale, kongresmeni rikonfirmoi mbështetjen e palëkundur për shtetësinë e Kosovës dhe nevojën për integrimin e saj në institucionet euroatlantike. Në të njëjtën kohë, AARC dhe Meeks riafirmuan rëndësinë e marrëdhënieve strategjike ndërmjet Shteteve të Bashkuara dhe Shqipërisë, duke shprehur mbështetje të qartë për rrugën evropiane të Tiranës. Lidhur me Serbinë, Meeks vlerësoi se duhet të ndryshojë qasja ndaj shqiptarëve që jetojnë atje, duke mbrojtur parimin që të drejtat e shqiptarëve në Luginën e Preshevës të jenë të barasvlershme me ato që u garantohen serbëve në Kosovë.
Një pjesë e diskutimeve iu kushtua zhvillimeve në Gjykatën Speciale në Hagë. Sipas njoftimit të AARC-së, Meeks vlerësoi nevojën për një rishqyrtim të mënyrës së trajtimit të procedurave gjyqësore, duke vënë theksin te nevoja për një rezultat që mund të çonte në lirimin e katër ish-krerëve të Ushtrisë Çlirimtare të Kosovës. Palët shqyrtuan gjithashtu mundësinë e organizimit të një vizite të një delegacioni dypartiak të Kongresit amerikan në rajon, që do të përfshinte Shqipërinë, Kosovën, Maqedoninë e Veriut, Malin e Zi, Serbinë dhe Luginën e Preshevës.
Në takimin e organizuar nga AARC morën pjesë personalitete të shquara të komunitetit shqiptaro-amerikan, duke përfshirë:
- Eli Rusi, kryetar i bordit
- Tony Marke, nënkryetar
- Burim Rexhaj, sekretar
- Roland Nezaj, arkëtar
- Vehbi Bajrami dhe Agim Jusufi, anëtarë të bordit.
Përditësime
Përfaqësuesit e AARC dhe kongresmeni Gregory Meeks diskutuan mbi forcimin e Kaukusit të Çështjeve Shqiptare dhe riafirmuan marrëdhëniet strategjike mes SHBA-së dhe Shqipërisë.