Niko Peleshi zhvillon vizitë zyrtare në Kongresin Amerikan

Niko Peleshi, kryetar i Kuvendit të Shqipërisë, në krye të një delegacioni parlamentar, zhvillon një vizitë pune në Shtetet e Bashkuara të Amerikës. Në Kongresin Amerikan, ai u takua me Keith Self, kryetar i Nënkomisionit për Evropën në Komisionin e Punëve të Jashtme të Dhomës së Përfaqësuesve, dhe me Pete Sessions, kryetar i Nënkomisionit për Qeverisjen.

Gjatë takimeve u nënvizua marrëdhënia e fortë, e qëndrueshme dhe strategjike ndërmjet Shqipërisë dhe Shteteve të Bashkuara, e ndërtuar mbi vlera të përbashkëta dhe një aleancë të palëkundur. Niko Peleshi riafirmoi angazhimin e plotë të Shqipërisë ndaj SHBA-së, partnerit kryesor strategjik, dhe shprehu mirënjohje për mbështetjen e vazhdueshme amerikane në integrimet euroatlantike të vendit si dhe në zbatimin e reformave transformuese, me fokus të veçantë reformën në drejtësi.

Palët shprehën vullnetin për të forcuar bashkëpunimin në fusha me interes të ndërsjellë, në përputhje me prioritetet strategjike dhe politikën e jashtme të SHBA-së nën udhëheqjen e Presidentit Trump. Ky bashkëpunim forcohet më tej përmes angazhimit të Shqipërisë në Bordin e Paqes të SHBA-së, ku vendi është anëtare themeluese, me pjesëmarrje të ratifikuar nga Kuvendi.

Në takimin me Keith Self, kryetari i Kuvendit vlerësoi paraqitjen në Kongres të nismës ligjore “The Presheva Valley Discrimination Assessment Act”, e cila kërkon nga Departamenti i Shtetit raportim mbi trajtimin e pakicave etnike nga Serbia, me fokus te shqiptarët e Luginës së Preshevës. U diskutua gjithashtu mbështetja e vazhdueshme e SHBA-së për integrimet euroatlantike të Kosovës dhe rëndësia e normalizimit të marrëdhënieve ndërmjet Kosovës dhe Serbisë.

Gjatë takimeve u theksua klima pozitive e krijuar në Shqipëri për investimet amerikane. Niko Peleshi ndau pamje nga takimet në rrjetet sociale, duke theksuar forcën e partneritetit strategjik Shqipëri-SHBA, mbështetjen amerikane për reformat, paqen dhe sigurinë në rajon.