Glauk Konjufca, nënkryetar i Lëvizjes Vetëvendosje, deklaroi se do të marrë pjesë në ditën përfundimtare të procesit gjyqësor në Hagë ndaj ish-krerëve të Ushtrisë Çlirimtare të Kosovës (UÇK). Ai ka paraqitur kërkesë për të qenë i pranishëm dhe do ta përfaqësojë shtetin e Kosovës.
Konjufca theksoi se askush nuk mund t’i ndajë qytetarët apo skenën politike për luftën çlirimtare. “Për UÇK-në jemi bashkë”, u shpreh ai, duke nënvizuar unitetin e gjerë politik e shoqëror rreth kësaj çështjeje. Sipas tij, përplasjet politike para vitit 2010 nuk kanë lidhje me luftën dhe vullnetin e popullit për liri.
Ai vlerësoi luftën e UÇK-së si luftë të drejtë dhe çlirimtare, ku personalitetet në krye të saj nuk kanë kryer krime. “Ata kanë qenë në krye të një ushtrie çlirimtare, e cila ka dhënë dëshmorët e saj”, tha Konjufca. Populli i Kosovës, sipas tij, ka dhënë mbi 12 mijë të vrarë, përfshirë fëmijë e gra shtatzëna, dhe kjo është e vërteta historike që askush nuk mund ta ndryshojë apo ta godasë.
Konjufca shprehu pritshmëri që akuzat kundër të pandehurve të dështojnë. “Janë të paqëndrueshme, shpifje e gënjeshtra që ofendojnë luftën tonë çlirimtare”, deklaroi ai. Ai uroi që të gjithë të akuzuarit, duke përmendur Hashim Thaçin, Kadri Veselin, Rexhep Selimin e Jakup Krasniqin, të dalin të pafajshëm në ditën përfundimtare.
Prokuroria ka kërkuar nga 45 vjet burgim për secilin prej tyre.