Zëvendëskryeministri i parë dhe ministri në detyrë i Punëve të Jashtme dhe Diasporës, Glauk Konjufca, i është drejtuar me një letër Përfaqësueses së Lartë të Bashkimit Evropian për Politikë të Jashtme dhe Siguri, Kaja Kallas, lidhur me deklaratën e ministres serbe Snezhana Paunoviq. Kjo e fundit pretendoi se, po të ishte në vend të Sllobodan Millosheviqit, do të kishte kryer spastrim etnik në Kosovë.
Në shkresën e tij, Konjufca vlerësoi se distancimi i mëvonshëm i Qeverisë së Serbisë ishte i karakterit formal dhe nuk përbënte një shprehje të sinqertë pendese. Ai shprehu shqetësimin mbi reagimin e vonuar të institucioneve të Bashkimit Evropian ndaj kësaj retorike, duke theksuar se një qëndrim i tillë nxit urrejtjen dhe dëmton procesin e dialogut.
Kërkesat kryesore të paraqitura nga Konjufca përfshijnë:
• Dënimin publik dhe të fuqishëm të deklaratës së Paunoviqit dhe retorikës revizioniste që ajo përfaqëson.
• Rikujtimin e autoriteteve serbe se qëndrime të tilla janë të papranueshme dhe bien ndesh me vlerat evropiane e kriteret e anëtarësimit në Bashkimin Evropian.
• Trajtimin e kësaj çështjeje në kuadër të dialogut politik ndërmjet Bashkimit Evropian dhe Serbisë.
Sipas Konjufcës, deklaratat e këtij niveli nuk mund të trajtohen si gabime të thjeshta. Ai ka kërkuar një takim ose bisedë telefonike me Kallasin për të diskutuar mbi ndikimin e këtyre qëndrimeve në stabilitetin rajonal dhe procesin e integrimit evropian të Serbisë.