Ambasadori i Kosovës në Bruksel dhe kryenegociatori, Agron Bajrami, ka kërkuar reagimin e emisarit të Bashkimit Evropian për dialogun, Peter Sorensen, lidhur me deklaratën e ministres serbe, Snezhana Paunoviq. Ministrja serbe pretendoi publikisht se, po të ishte në vend të Sllobodan Millosheviqit, do të kishte kryer spastrim etnik në Kosovë.
Sipas Bajramit, kjo deklaratë pasqyron qëndrimin e vërtetë të presidentit serb, Aleksandar Vuçiq, duke theksuar se përpjekjet aktuale të këtij të fundit për të kontrolluar dëmet janë të pamjaftueshme. Ambasadori vlerësoi se retorika e tillë bie ndesh me preambulën e Marrëveshjes së Brukselit të vitit 2023, e cila kërkon tejkalimin e trashëgimisë së kaluar dhe respektimin e integritetit territorial.
"Deklarata dhe sjellje të tilla nga zyrtarët serbë dëmtojnë seriozisht dialogun, besimin dhe procesin e normalizimit", ka deklaruar Bajrami. Ai shtoi se distancimi i autoriteteve të Serbisë nga këto deklarata nuk përfaqëson pendim të sinqertë apo refuzim të krimeve të së kaluarës.
Në përfundim, ambasadori Bajrami theksoi se Kosova mbetet e përkushtuar ndaj dialogut, por shtroi pyetjen mbi vlerën e zbatimit të marrëveshjeve kur ato shkelen vazhdimisht me fjalë dhe vepra nga ana e Serbisë.
Përditësime
Raportuesi i Parlamentit Evropian për Kosovën, Riho Terras, ka dënuar deklaratën e ministres serbe Paunoviq, duke e cilësuar atë si të papranueshme. Terras paralajmëroi se ky qëndrim cenon rëndë besimin në dialogun ndërmjet Kosovës dhe Serbisë.