Raportuesi i Parlamentit Evropian për Kosovën, Riho Terras, ka reaguar ashpër ndaj deklaratës së ministres serbe Snezhana Paunoviq, e cila në një deklaratë të saj kishte pohuar: “Po të isha në vend të Millosheviqit në vitin 1998, do ta kisha spastruar etnikisht Kosovën”.
Terras e cilësoi këtë qëndrim si të turpshëm dhe të dëmshëm për besimin në dialogun e lehtësuar nga Bashkimi Evropian. Përmes një postimi në platformën X, ai theksoi se deklarata të tilla shkatërrojnë seriozisht procesin e normalizimit ndërmjet Kosovës dhe Serbisë.
Në lidhje me këtë rast, kryenegociatori i Kosovës, Agron Bajrami, ka njoftuar zyrtarisht institucionet e Bashkimit Evropian. Sipas Bajramit, kjo deklaratë përbën shkelje direkte të Marrëveshjes së Brukselit të vitit 2023 dhe minon themelin e besimit të nevojshëm për dialogun politik.