Ministri i Jashtëm në detyrë, Glauk Konjufca, ka shprehur qëndrimin e autoriteteve të Kosovës lidhur me idenë e përfshirjes së vendeve të Ballkanit Perëndimor në Tregun e Përbashkët Evropian. Gjatë pjesëmarrjes në forumin e sigurisë GLOBSEC në Pragë, Konjufca deklaroi se, ndonëse vendi mirëpret çdo nismë që synon përshpejtimin e integrimit evropian, mbetet skeptik ndaj mekanizmave që mund të prodhojnë një status të ndërmjetëm ose "dhoma pritjeje" për shtetet aspirante.
Sipas Konjufcës, kjo iniciativë, e cila u përshëndet nga kancelari gjerman Friedrich Merz dhe u mbështet nga shtete si Austria dhe Çekia, synon t'i japë një shpejtësi të re procesit të zgjerimit. Megjithatë, ministri theksoi se për momentin mungojnë detajet konkrete mbi mënyrën e zbatimit.
"Ne nuk mbështesim kurrfarë propozimi, i cili krijon dhoma të pritjes në BE", u shpreh Konjufca, duke shtuar se pret që në javët në vijim të ketë hollësi dhe sqarime më të qarta mbi strukturimin e këtij procesi. Ai vlerësoi se thelbi i rrugës drejt Bashkimit Evropian mbetet përmbushja e kritereve ekonomike dhe krijimi i mekanizmave të nevojshëm për integrimin e plotë në tregun unik.