Glauk Konjufca, ministër i Punëve të Jashtme të Kosovës, zhvilloi në Dublin të Irlandës vizitën e tij të parë bilaterale, ku u takua me Helen McEntee, ministre e Punëve të Jashtme, Tregtisë dhe Mbrojtjes.
Takimi u zhvillua në atmosferë produktive dhe miqësore. Palët diskutuan marrëdhëniet dypalëshe ndërmjet Kosovës dhe Irlandës, miqësinë mes popujve të tyre si dhe vlerat e përbashkëta. U vlerësua nevoja për zgjerimin dhe intensifikimin e bashkëpunimit në fusha të ndryshme.
Një pjesë qendrore e bisedimeve ishte rruga e Kosovës drejt integrimit në Bashkimin Evropian. Konjufca kërkoi mbështetje aktive nga Irlanda për pranimin e aplikimit të Kosovës për anëtarësim, i dorëzuar zyrtarisht në dhjetor 2022 dhe që ende pret vendim nga Këshilli i BE-së. Kjo kërkesë erdhi në prag të presidencës së Këshillit të BE-së nga Irlanda.
Sipas Konjufcës, palët u dakorduan se Kosova nuk veçohet nga procesi dhe përcaktimi i anëtarësimit të vendeve të Ballkanit Perëndimor në BE.
Gjatë vizitës, Konjufca u takua po ashtu me anëtarë të Komitetit të Përbashkët për Çështjet e Bashkimit Evropian të Parlamentit irlandez, si dhe me senatorin Pat Casey. Këto takime riafirmuan mbështetjen parlamentare të Irlandës për rrugën evropiane të Kosovës.
Konjufca njoftoi për takimin përmes postimeve në rrjetet sociale, duke e cilësuar atë si produktiv.