Glauk Konjufca, Zëvendëskryeministër i Parë dhe Ministër i Punëve të Jashtme dhe Diasporës i Kosovës, zhvilloi më 24 shkurt 2026 në Vjenë një takim me Beate Meinl-Reisinger, Ministren Federale për Çështje Evropiane dhe Ndërkombëtare të Austrisë.
Gjatë takimit u diskutua thellimi i marrëdhënieve bilaterale ndërmjet Republikës së Kosovës dhe Austrisë, avancimi i integrimit evropian të Kosovës, si dhe bashkëpunimi për stabilitetin rajonal. Sipas njoftimit të Ministrisë së Punëve të Jashtme dhe Diasporës, Konjufca falënderoi Meinl-Reisinger për kontributin e hershëm dhe të vazhdueshëm të Austrisë në shtetndërimin dhe konsolidimin ndërkombëtar të Kosovës.
Ai theksoi rëndësinë e mbështetjes austriake për pranimin e aplikimit të Kosovës për anëtarësim në Bashkimin Evropian, dhënien e statusit të vendit kandidat dhe hapjen sa më të shpejtë të negociatave për anëtarësim. Austria konsiderohet partner i afërt dhe i qëndrueshëm i Kosovës në rrugën evropiane.
Pas takimit, Beate Meinl-Reisinger reagoi në platformën X, duke falënderuar Konjufcën për vizitën, një nga të parat si ministër i jashtëm. Ajo përmendi njohjen e hershme të Kosovës nga Austria si një nga shtetet e para anëtare të BE-së, lidhjet e forta dypalëshe përfshirë ato ekonomike, dhe premtoi: "Mund të mbështeteni në mbështetjen tonë të fortë për rrugën e Kosovës drejt Bashkimit Evropian".