Kryeministri në detyrë i Republikës së Kosovës, Albin Kurti, zhvilloi një takim bilateral me kancelarin e Republikës Federale të Austrisë, Christian Stocker, në kuadër të vizitës së tij zyrtare në Vjenë. Gjatë takimit, palët diskutuan për forcimin e marrëdhënieve dypalëshe, me theks të veçantë te bashkëpunimi ekonomik e tregtar, investimet, energjia, transformimi digjital dhe siguria.
Një ndër temat kryesore të diskutuara ishte përpjekja e Kosovës për anëtarësim në Këshillin e Evropës. Kurti vlerësoi mbështetjen e vazhdueshme të Austrisë ndaj Kosovës që nga vitet ’90, duke përfshirë rolin e kësaj të fundit në Asamblenë Parlamentare të Këshillit të Evropës dhe kontributin në kuadër të KFOR-it. Kurti nënvizoi rëndësinë që Bashkimi Evropian të përgjigjet me dhënien e statusit të shtetit kandidat për Kosovën dhe hapjen e negociatave.
Palët shkëmbyen urime për zhvillimet e fundit politike; Kurti uroi Austrinë për zgjedhjen si anëtare jo e përhershme e Këshillit të Sigurimit të Kombeve të Bashkuara për periudhën 2027-2028, ndërsa kancelari Stocker uroi kryeministrin në detyrë për rezultatet e zgjedhjeve të parakohshme parlamentare të datës 7 qershor.
Vizita e kryeministrit në detyrë në Austri vijoi me pjesëmarrjen në Forumin Ekonomik të Vjenës, ku fokusi ishte zhvillimi i qëndrueshëm rajonal, investimet dhe perspektiva evropiane për vendet e Ballkanit Perëndimor.