Ministri i Bujqësisë, Pylltarisë dhe Zhvillimit Rural i Kosovës, Armend Muja, zhvilloi një vizitë zyrtare në Vjenë, ku u prit nga Ministri Federal i Bujqësisë, Pylltarisë, Klimës dhe Menaxhimit të Ujërave i Austrisë, Norbert Totschnig. Takimi u fokusua në thellimin e bashkëpunimit dypalësh dhe avancimin e reformave thelbësore në sektorin bujqësor.
Diskutimet u përqendruan në procesin e integrimit evropian të Kosovës dhe domosdoshmërinë e harmonizimit të politikave bujqësore me standardet dhe praktikat e Bashkimit Evropian. Ministrat ndanë përvoja të rëndësishme lidhur me modernizimin e sektorit, duke u ndalur në çështje kyçe si:
• Forcimi i sistemit të kontrollit zyrtar të ushqimit.
• Zhvillimi i sistemeve të paralajmërimit të hershëm dhe masat për mbrojtjen nga breshëri.
• Përshpejtimi i digjitalizimit në bujqësi.
Palët shqyrtuan gjithashtu mundësitë për zgjerimin e bashkëpunimit ndërmjet instituteve bujqësore dhe institucioneve kërkimore të të dyja vendeve. Një mekanizëm i rëndësishëm për zbatimin e praktikave evropiane do të jetë shkëmbimi i ekspertëve, studiuesve, nëpunësve dhe studentëve, me qëllim forcimin e kapaciteteve profesionale dhe transferimin e njohurive.
Ministri Armend Muja falënderoi homologun austriak për mbështetjen e vazhdueshme të Austrisë ndaj Kosovës. Ai theksoi se ky partneritet është thelbësor për rritjen e konkurrueshmërisë së prodhimeve bujqësore dhe përshpejtimin e përafrimit të vendit me standardet e Bashkimit Evropian.