Glauk Konjufca, Zëvendëskryeministër i Parë dhe Ministër i Punëve të Jashtme dhe Diasporës, zhvilloi vizitë zyrtare në Strasburg, ku u takua me drejtues të lartë të Këshillit të Evropës. Në fokus të takimeve ishte procesi i anëtarësimit të Kosovës në këtë organizatë.
Gjatë vizitës, Konjufca u takua me Alain Berset, Sekretarin e Përgjithshëm të Këshillit të Evropës, me të cilin diskutoi për avancimin e këtij procesi. Ai theksoi se procesi është përmbyllur në aspektin institucional dhe teknik, duke rikujtur vlerësimin pozitiv të Asamblesë Parlamentare se Kosova i përmbush të gjitha kriteret. Mbështetja politike reflektohet në 82% të votave në favor të anëtarësimit.
Konjufca shprehu shqetësim për vonesat e lidhura me dinamika politike jashtë kornizës së organizatës, të cilat ndikojnë në besueshmërinë e proceseve dhe të drejtat e qytetarëve. Ai ritheksoi përkushtimin e Kosovës ndaj vlerave demokratike, sundimit të ligjit dhe mbrojtjes së të drejtave të njeriut.
Ai u takua gjithashtu me Petra Bayr, Presidenten e Asamblesë Parlamentare të Këshillit të Evropës, të cilën e uroi për detyrën dhe e falënderoi për mbështetjen ndaj Kosovës. Takimet e tjera përfshinin Mathieu Mori, Sekretarin e Përgjithshëm të Kongresit të Autoriteteve Lokale dhe Rajonale; Frank Schwabe, Presidentin e Grupit Socialist, Demokrat dhe të Gjelbërve; Iulian Bulai, Presidentin e Grupit ALDE; Knut Abraham, zëvendëspresidentin e EPP-së dhe shefin e delegacionit gjerman; si dhe Piero Fassino, kryetarin e Nënkomitetit për Ballkanin Perëndimor.