Komisionarja evropiane për Zgjerim, Marta Kos, tha më 15 tetor se ndryshimet e fundit në Ligjin për Dhomat e Specializuara të Kosovës janë të papranueshme. Në një postim në platformën X, ajo tha se miratimi dhe zbatimi i tyre do të binin ndesh me zotimet e Kosovës ndaj Bashkimit Evropian dhe do të përbënin një hap serioz prapa në rrugën drejt BE-së. Kos theksoi se respektimi i sundimit të ligjit dhe i institucioneve të pavarura gjyqësore është thelbësor për hapat e ardhshëm të Kosovës drejt integrimit evropian.
Kos e bëri deklaratën pas takimit në Bruksel me kryenegociatorin e Kosovës për BE-në, Jeton Zulfaj. Ajo vlerësoi se, pavarësisht paqëndrueshmërisë institucionale gjatë dy viteve të fundit, Kosova ka përparuar në reformat për sundimin e ligjit dhe në Planin e Rritjes, si dhe ka bërë përparim drejt përfshirjes në Zonën Unike të Pagesave në Euro (SEPA).
Sipas njoftimit të Zulfajt, në takim u diskutuan reformat për integrimin evropian, forcimi i sundimit të ligjit dhe konsolidimi i institucioneve demokratike. U shqyrtuan gjithashtu Plani i Rritjes, SEPA dhe nisma “Roam Like at Home”. Zulfaj tha se Qeveria e Kosovës po i trajton këto çështje me përparësi dhe riafirmoi përkushtimin e vendit ndaj vlerave të BE-së dhe harmonizimit me Politikën e Përbashkët të Jashtme dhe të Sigurisë.
Një nga temat ishte aplikimi i Kosovës për anëtarësim në BE, i dorëzuar më 15 dhjetor 2022. Zulfaj kërkoi mbështetjen aktive të Komisionit Evropian për procesin e pyetësorit, marrjen e statusit të vendit kandidat dhe hapjen e negociatave. Ai tha se Kosova i njeh sfidat e procesit të zgjerimit dhe do t’i trajtojë gjatë rrugës drejt anëtarësimit. Sipas njoftimit, ai përmendi edhe mbështetjen dhe investimet e BE-së, të cilat, tha ai, kanë kontribuar në ndërtimin e institucioneve demokratike, garantimin e të drejtave të barabarta dhe sigurinë për qytetarët.
Për ligjin, Zulfaj i shpjegoi Kos-it kontekstin e miratimit dhe e cilësoi të padrejtë verdiktin e shpallur më 16 shtator ndaj ish-krerëve të Ushtrisë Çlirimtare të Kosovës. Ai tha se pret që vendimi të korrigjohet në shkallën e apelit dhe se Qeveria ka formuar një grup punues për hartimin e një strategjie shtetërore lidhur me këtë çështje. Zulfaj gjithashtu kërkoi që BE-ja të njohë përkushtimin e institucioneve dhe qytetarëve të Kosovës për zbatimin e reformave.