Ministria e Financave e Kosovës ka organizuar një aktivitet në kuadër të Procesit të Berlinit me temën "Beyond Compliance – Ndërtimi i ekonomive të qëndrueshme përmes integritetit financiar". Ministri Hekuran Murati deklaroi se qeveria ka ndërmarrë hapa konkretë për të kufizuar pagesat me para të gatshme, me qëllim parandalimin e financimit të paligjshëm.
Sipas vendimit të ri, kufiri i pagesave me para të gatshme ndërmjet bizneseve është ulur nga 500 euro në 300 euro. Për transaksionet ndërmjet bizneseve dhe konsumatorëve, tavani për pagesat në para të gatshme është përcaktuar në 2.000 euro. Çdo shumë që e tejkalon këtë limit duhet të realizohet përmes institucioneve financiare të licencuara, duke siguruar kështu gjurmueshmërinë e fondeve.
Një tjetër masë e ndërmarrë është përfshirja e Bankës Qendrore të Kosovës në kontrollin dhe licencimin e operatorëve që ofrojnë shërbime të këmbimit të kriptomonedhave. Ministri Murati theksoi se këto veprime ndihmojnë në digjitalizimin e transaksioneve, nxitjen e konkurrencës së ndershme dhe kalimin e aktiviteteve nga ekonomia joformale në atë formale.
Në këtë aktivitet mori pjesë edhe ambasadori i Malit të Zi në Kosovë, Bernard Çobaj, i cili vlerësoi rëndësinë e bashkëpunimit rajonal në kuadër të Procesit të Berlinit. Ai theksoi se integriteti financiar është vendimtar për mbrojtjen e burimeve publike dhe ndërtimin e ekonomive të besueshme, të cilat janë rezistente ndaj pastrimit të parave dhe korrupsionit.