Komisioni për Buxhet i Kuvendit të Kosovës miratoi Projektligjin për ratifikimin e Marrëveshjes së Kredisë ndërmjet Republikës së Kosovës, e përfaqësuar nga Ministria e Financave, dhe Asociacionit Ndërkombëtar për Zhvillim për Projektin e Zhvillimit të Sektorit Financiar të Kosovës. Votimi rezultoi me 6 vota pro, 2 kundër dhe 1 abstenim. Kundër votuan deputetët e Partisë Demokratike të Kosovës (PDK), Kujtim Gashi dhe Mërgim Lushtaku.
Ministri i Financave, Hekuran Murati, prezantoi marrëveshjen dhe e cilësoi atë si mundësi për forcimin e stabilitetit financiar në vend. Ai përmendi se shuma totale është 49.3 milionë euro, me kushte kthimi specifike: për 35 milionë euro të komponentës A, 5 vite periudhë grejs dhe 25 vite kthim; për 14 milionë euro të komponentës B, 5 vite periudhë grejs dhe 5 vite kthim.
Marrëveshja parashikon katër komponentë kryesorë:
- Themelimin dhe financimin e kapitalit fillestar të Bankës Zhvillimore, prioritet qeveritar;
- Shtimin e kapitalit në Fondin për Garanci Kreditore për dritare të reja, që përmirësojnë qasjen në financim për ndërmarrjet mikro, të vogla dhe të mesme;
- Mbështetje për Fondin për Sigurimin e Depozitave, përfshirë ndryshime në kornizën ligjore dhe ngritjen e nivelit të depozitave të siguruara në bankat komerciale nga 5 mijë euro në 10 mijë euro;
- Integrimin e Kosovës në SERA, që ul kostot e transfereve.
Deputeti i PDK-së, Kujtim Gashi, argumentoi se Kosova nuk ka nevojë për një borxh të tillë, pasi asistenca teknike mund të mbulohet nga buxheti ekzistues. Anëtari i LDK-së në komision, Besian Mustafa, kërkoi sqarime për dallimin mes Bankës Zhvillimore dhe Fondit për Garanci Kreditore.