Kosova po humb mundësinë për të shfrytëzuar mbi një miliard euro fonde ndërkombëtare për më shumë se një vit. Këto fonde presin ratifikimin në Kuvendin e Kosovës dhe përfshijnë 882 milionë euro nga Plani për Reforma dhe Rritje i Bashkimit Evropian (BE), si dhe mbi 120 milionë euro nga tri marrëveshje me Asociacionin Ndërkombëtar për Zhvillim (ANZH) të Bankës Botërore.
Marrëveshjet mbërritën në Kuvend në fund të vitit 2024, por nuk janë ratifikuar ende për shkak të mungesës së institucioneve të reja gjatë vitit 2025. Zyra e Bankës Botërore në Kosovë ka konfirmuar se afati i fundit për hyrjen në fuqi të marrëveshjes për politikën zhvillimore – që mbështet efektivitetin fiskal, konkurrueshmërinë dhe rritjen e gjelbër – është 13 shkurt 2026.
Banka Botërore ka miratuar gjithashtu dy projekte të tjera:
- Forcimi i Sistemit Shëndetësor, në vlerë 18.6 milionë euro;
- Projekti i arsimit dhe kujdesit në fëmijërinë e hershme, po ashtu 18.6 milionë euro.
Afati i fundit për këto dy projekte është 30 prill 2026, përkatësisht 7 maj 2026.
Deputeti i PDK-së, Ferat Shala, ka deklaruar se vonesat në krijimin e institucioneve dhe mungesa e procedurave parlamentare të rregullta po rrezikojnë ekonominë e vendit. Ai theksoi se fondet e BE-së, Bankës Botërore dhe mekanizmave të tjerë ndërkombëtarë nuk mund të alokohen pa u krijuar institucionet dhe pa kaluar procedurat parlamentare.