Kosova rrezikon të humbasë mbi 250 milionë euro nga Plani i Rritjes i Bashkimit Evropian deri në fund të vitit, për shkak të moszbatimit në kohë të reformave të kërkuara.
Komisioni Evropian ka konfirmuar se ende nuk ka pranuar kërkesën e Kosovës për pagesën e radhës. Afati për dorëzimin e kësaj kërkese është 15 korriku, ndërsa 30 qershori është afati përfundimtar për zbatimin e 13 reformave të parapara, të vlerësuara mbi 90 milionë euro. Në fund të vitit skadon edhe afati për 27 hapa të tjerë reformash, në vlerë prej afro 166 milionë euro.
Të mërkurën Komisioni Evropian miratoi pagesat për Shqipërinë, Maqedoninë e Veriut dhe Malin e Zi në një shumë të përbashkët prej afër 160 milionë euro. Kosova ka marrë vetëm fondet e parafinancimit pas ratifikimit të marrëveshjes. Bosnja e Hercegovina nuk ka marrë asnjë fond, ndërsa kërkesa e Serbisë është ende në shqyrtim.
Zyrtarët e Komisionit Evropian kanë theksuar se Kosova duhet të përshpejtojë zbatimin e Agjendës së Reformave për të shmangur humbjen e fondeve, të cilat janë të pakthyeshme.