Komisioni Evropian ka konfirmuar se po shqyrton raportin e dorëzuar nga Kosova për zbatimin e reformave në kuadër të Instrumentit për Reformë dhe Rritje. Procesi i vlerësimit vjen pas përfundimit të afatit të dorëzimit më 15 korrik 2026 për të gjitha shtetet e Ballkanit Perëndimor.
Sipas të dhënave, afati për zbatimin e masave të reformës ishte 30 qershori 2026, datë që shënoi përfundimin e periudhës shtesë për hapat e parashikuar që nga mesi i vitit 2025. Kryenegociatori i Kosovës për Bashkimin Evropian, Jeton Zulfaj, konfirmoi se nga 13 hapa që kërkoheshin, shtatë janë realizuar, ndërsa gjashtë kanë mbetur pa u përmbushur.
Sipas Zulfajt, pesë nga këto reforma vareshin nga miratimi i ligjeve në Kuvend, ndërsa Strategjia për Luftimin e Krimit të Organizuar nuk mund të procedohej për shkak të statusit të qeverisë në detyrë. Për shkak të këtyre ngecjeve, Kosova llogaritet të humbasë mbi 40 milionë euro të dedikuara për këto projekte.
Ndërkohë, institucionet e Kosovës janë fokusuar në objektivat e ardhshëm. Sipas planit, deri më 31 dhjetor 2026 duhet të realizohen 61 hapa të rinj, të cilët lidhen me rreth 444 milionë euro. Nga ky grup masash, 22 hapa kanë afat deri në fund të vitit, me një vlerë të vlerësuar prej 131.7 milionë eurosh. Komisioni Evropian ende nuk ka dhënë një afat për publikimin e vendimit mbi disbursimet.