Qeveria e Kosovës miratoi pakon e 19-të të sanksioneve të Bashkimit Evropian kundër Rusisë për shkak të luftës së saj kundër Ukrainës. Pakoja u miratua në mbledhjen e kabinetit të kryeministrit Albin Kurti të premten në mëngjes dhe përfshin edhe sanksione ndaj Bjellorusisë.
Ministri i Jashtëm Glauk Konjufca deklaroi se Kosova synon promovimin e paqes dhe lirisë, ndërsa vendimi forcon bashkëpunimin e ngushtë me BE-në dhe Shtetet e Bashkuara. Kosova ka miratuar të gjitha pakot e mëparshme të bllokut evropian kundër Rusisë.
Detajet e pakos
Pakoja e 19-të, e miratuar nga BE-ja në tetor të vitit të kaluar, rrit trysninë mbi ekonominë ruse duke synuar sektorë kyç:
• energjinë;
• financat;
• bazën ushtarako-industriale;
• zonat e veçanta ekonomike;
• mbështetësit dhe përfituesit e luftës.
Mes masave kryesore spikasin:
• ndalimi i plotë i gazit natyror të lëngshëm (LNG) rus, që hyn në fuqi në dy faza: kontratat afatshkurtra pas gjashtë muajsh, ndërsa ato afatgjata nga 1 janari 2027;
• goditje ndaj flotës në "hije" të Rusisë, me 557 anije të listuara gjithsej;
• masa ndaj shërbimeve financiare e infrastrukturës, duke përfshirë për herë të parë kriptovalutat;
• forcim i mjeteve kundër anashkalimit të sanksioneve dhe prekje e tregtisë e shërbimeve.
Kosova u rreshtua përkrah Perëndimit menjëherë pas pushtimit rus të Ukrainës në shkurt 2022 dhe ka miratuar që atëherë pakot e BE-së e SHBA-së kundër Moskës. Sipas Kombeve të Bashkuara, lufta ka marrë jetën e mbi 10 000 civilëve në Ukrainë, ndërsa të paktën 40 për qind e popullsisë ka nevojë për ndihmë humanitare.