Komisionarja për Zgjerim e Bashkimit Evropian, Marta Kos, deklaroi se zhvillimet në lidhje me pesë shtetet evropiane që nuk e njohin pavarësinë e Kosovës janë inkurajuese. Kjo u tha gjatë një mbledhjeje të jashtëzakonshme të Komitetit për Punë të Jashtme të Parlamentit Evropian më 20 prill 2026.
Raportuesi për Kosovën në PE, Riho Terras, e pyeti komisionaren Kos për veprimet e Komisionit Evropian ndaj Greqisë, Spanjës, Rumanisë, Sllovakisë dhe Qipros, shteteve anëtare të BE-së që nuk e njohin pavarësinë e shpallur nga Kosova në 2008. Kos u përgjigj se ndjek zhvillimet dhe ato janë inkurajuese, pa dhënë detaje të mëtejshme.
Mosnjohja nga këto shtete vlerësohet si pengesë për integrimin evropian të Kosovës. Aplikimi i Kosovës për anëtarësim në BE, dorëzuar në dhjetor 2022, ende nuk ka kaluar fazën e parë formale të shqyrtimit nga Këshilli i BE-së.
Terras e pyeti gjithashtu pse Kos nuk e ka vizituar Kosovën që kur ka marrë mandatin. Ajo shpjegoi se mbetet në kontakt me autoritetet në Prishtinë dhe ka shtyrë vizitën për shkak të situatës politike. Megjithatë, në fjalën hyrëse premtoi se do të qëndrojë së shpejti në Prishtinë për të çuar përpara Planin e Rritjes.
"Kemi hequr masat dhe presim që Qeveria të vazhdojë me reformat e nevojshme për të përfituar nga mbështetja e BE-së", tha ajo.
Më 16 prill, Kosova mori 61.8 milionë euro parafinancim nga ky plan, pas dorëzimit të dokumenteve dhe ratifikimit të marrëveshjeve. Pakoja për Ballkanin Perëndimor për periudhën 2024-2027 vlen 6 miliardë euro.
Rreziku i humbjes së fondeve
Një burim i BE-së raportoi se Marta Kos u ka dërguar letër gjashtë vendeve të Ballkanit Perëndimor, duke i paralajmëruar për humbjen e fondeve nëse nuk përmbushin reformat deri në 30 qershor. Kosova rrezikon të humbë 68.8 milionë euro në qershor, pasi nuk ka përmbushur asnjë nga 11 hapet e parashikuara. Afatet për hapat e vitit 2024 skadojnë në fund të 2026.