Kosova është ndër 19 shtetet që të enjten nënshkruan pjesëmarrjen në Bordin e Paqes, organ ndërkombëtar të ri për mbikëqyrjen e zbatimit të planeve të paqes në zona të konfliktit. Ceremonia u zhvillua në Davos, Zvicër, si iniciativë e presidentit amerikan Donald Trump.
Bordi përshkruhet si “organ ndërkombëtar tranzitor” që synon rindërtimin e enklavës palestineze, me fokus fillestar në Rripin e Gazës. Krijimi i tij u mbështet nga Këshilli i Sigurimit i Kombeve të Bashkuara përmes një rezolute të SHBA-së, duke i dhënë legjitimitet ndërkombëtar.
Synimet e Bordit
Sipas dokumentit të nënshkruar nga presidentja Vjosa Osmani:
- Promovon stabilitet, rivendos qeverisje të besueshme dhe siguron paqe të qëndrueshme në zonat e konfliktit.
- Ndërmerr funksione të ndërtimit të paqes sipas së drejtës ndërkombëtare dhe zhvillon praktika të mira për kombet dhe komunitetet që kërkojnë paqe.
Anëtarësia
- E kufizuar në shtetet e ftuara nga kryetari dhe përfaqësohet nga presidenti ose kryeministri.
- Mandati standard është tre vjet, me mundësi rinovimi, përjashtuar shtetet që kontribuojnë mbi 1 miliard dollarë brenda vitit të parë.
- Anëtarët mund të tërhiqen me njoftim me shkrim dhe mund të riftohen më vonë.
Qeverisja
Bordi përbëhet nga shtetet anëtare dhe Bordi Ekzekutiv, që përfshin liderë botërorë. Mbledhjet për vendime organizohen të paktën një herë në vit, ndërsa Bordi Ekzekutiv takohet çdo dy javë për tre muajt e parë dhe më pas çdo muaj. Vendimet merren me shumicë votash, me mundësi vetoje nga kryetari.
Roli i Kryetarit
Donald J. Trump është kryetar inaugurues dhe përfaqësues i SHBA-së. Ai ka autoritet ekskluziv për të krijuar, modifikuar ose shpërndarë subjekte ndihmëse, për të themeluar nënkomitete, për të caktuar pasues në rast dorëheqjeje ose paaftësie dhe për të miratuar rezoluta për zbatim të misionit.