Qeveria shqiptare ka depozituar në Kuvend projektligjin për ratifikimin e marrëveshjes së pranimit të Republikës së Shqipërisë, të përfaqësuar nga Kryeministri Edi Rama, në Kartën e Bordit të Paqes. Ky vendim u mor me numrin 45, datë 21 janar 2026. Kuvendi pritet ta shqyrtojë dhe ta miratojë nesër në seancë plenare.
Çfarë është Bordi i Paqes
Bordi i Paqes krijohet si organizatë ndërkombëtare me personalitet juridik ndërkombëtar. Misioni përfshin promovimin e stabilitetit, rivendosjen e qeverisjes ligjshme dhe sigurimin e paqes së qëndrueshme në territore të prekura ose të kërcënuara nga konfliktet, si Lindja e Mesme ose Gaza. Aktiviteti zhvillohet në përputhje me të drejtën ndërkombëtare. Organizata është iniciuar nga Shtetet e Bashkuara të Amerikës dhe mbështetet nga një rezolutë e Këshillit të Sigurimit të OKB-së të vitit 2025.
Roli i Shqipërisë
Shqipëria do të ketë statusin e anëtarit themelues, çka i jep rol aktiv dhe të barabartë në formësimin e vizionit, parimeve dhe arkitekturës vendimmarrëse. Ky status rrit profilin ndërkombëtar të vendit, e pozicionon si faktor stabiliteti dhe konfirmon partneritetin strategjik me SHBA.
Struktura dhe funksionimi
Bordi drejtohet nga një kryetar, me dy struktura kryesore: Bordi i Shteteve Anëtare dhe Bordi Ekzekutiv. Vendimet merren me shumicë votash, por kërkojnë konfirmimin e kryetarit, i cili gëzon të drejtën e vetos dhe autoritetin përfundimtar interpretues. Karta përbëhet nga 13 kreu që rregullojnë krijimin dhe funksionimin.
Financimi sigurohet përmes kontributeve vjetore vullnetare të shteteve anëtare.
Kushtet e anëtarësimit
Anëtarësimi realizohet me ftesë nga kryetari dhe njoftim formal të pëlqimit. Shtetet përfaqësohen nga kreu i shtetit ose i qeverisë. Mandati është trevjeçar, subjekt rinovimi nga kryetari, përjashtim për shtetet që kontribuojnë mbi 1 miliard dollarë amerikanë në fonde monetare brenda vitit të parë.
Anëtarësimi përfundon në rastet:
- përfundim i mandatit trevjeçar pa rinovim;
- tërheqje;
- vendim të kryetarit;
- shpërbërje të bordit.
Karta garanton sovranitetin: bordi nuk ka juridiksion brenda territorit të anëtarëve dhe pjesëmarrja në misione është vullnetare.
Përditësime
Ministria për Evropën dhe Punët e Jashtme ngarkohet me zbatimin e projektligjit për aderimin në Bordin e Paqes.
Kuvendi miratoi me 80 vota pro procedurën e përshpejtuar për shqyrtimin e marrëveshjes së anëtarësimit të Shqipërisë në Bordin e Paqes.
Kuvendi miratoi ratifikimin e aderimit të Shqipërisë në Bordin e Paqes me 113 vota pro, 1 abstenim nga Redi Muci dhe 0 kundër.
- Amendamenti i opozitës për heqjen e emrit të kryeministrit Edi Rama u rrëzua me 79 vota kundër dhe 30 pro.
- Miratimi u bë nen për nen me 110 vota pro.
- Presidenti Bajram Begaj autorizoi kryeministrin Edi Rama për nënshkrim.
- Nisma vjen nga Presidenti i SHBA-së, Donald Trump.