Në Komisionin e Jashtëm të Kuvendit miratohet me 13 vota pro projektligji për Bordin e Paqes. Partitë PS dhe PD bashkojnë votat për këtë vendim.
Ministrja për Europën dhe Punët e Jashtme, Elisa Spiropali, e pranishme në komision, tha se projektligji është në përputhje me dispozitat e Kushtetutës së Republikës së Shqipërisë dhe me ligjin për marrëveshjet ndërkombëtare. Sipas saj, ky partneritet është shtylla kryesore e politikës së jashtme dhe garanci për orientimin euroatlantik të vendit.
Spiropali shpjegoi detajet e Kartës së Bordit të Paqes:
- Asnjë shtet nuk është i detyruar të marrë pjesë në misione pa pëlqimin e tij.
- Sovraniteti kombëtar mbetet i paprekur.
- Shtetet mund të përfaqësohen nga kreu i shtetit ose kreu i qeverisë.
- Çdo shtet anëtar ka një mandat tre vjeçar, subjekt i rinovimit nga kryetari i Bordit të Paqes.
Ministrja theksoi se projektligji nuk sjell kosto shtesë për buxhetin e shtetit. Kontributet janë vullnetare dhe planifikohen në mënyrë transparente në buxhetin e Ministrisë për Europën dhe Punët e Jashtme, sipas standardeve buxhetore afatmesme. Akti është hartuar nga kjo ministri, në bazë të informacioneve nga ambasada e Shqipërisë në Uashington.