Ministria e Financave e Kosovës dhe Banka Gjermane për Zhvillim (KfW) kanë zyrtarizuar nënshkrimin e një marrëveshjeje granti në vlerë prej 5 milionë eurosh. Ky financim shtesë i dedikohet realizimit të investimeve prioritare në kuadër të fazës së shtatë të projektit për përmirësimin e rrjetit të transmisionit të energjisë elektrike.
Projekti, i cili po zbatohet nga Operatori i Sistemit, Transmisionit dhe Tregut të Energjisë Elektrike (KOSTT), synon të modernizojë infrastrukturën ekzistuese, të rrisë sigurinë dhe besueshmërinë e furnizimit me energji, si dhe të mbështesë procesin e integrimit të tregut energjetik.
Ministri i Financave, Hekuran Murati, vlerësoi angazhimin e KOSTT-it në zbatimin e projektit dhe nënvizoi se ky investim forcon qëndrueshmërinë e sistemit energjetik në vend. Nga ana tjetër, drejtori i KfW për Kosovën, Moritz Remé, konfirmoi gatishmërinë e institucionit për të vazhduar mbështetjen për modernizimin e këtij sektori strategjik.
Kryeshefi ekzekutiv i KOSTT-it, Trim Tërnava, theksoi se realizimi i projekteve po vijon sipas dinamikës së planifikuar. Sipas tij, mbështetja e re financiare do të krijojë mundësi për avancime teknologjike, duke e bërë rrjetin e transmisionit më të aftë për t’iu përgjigjur kërkesave të së ardhmes.