Ministria e Financave e Kosovës nënshkroi në 23 mars 2026 dy marrëveshje me Bankën Botërore, në vlerë totale 96 milionë euro, për forcimin e sektorit financiar dhe lehtësimin e tregtisë.
Marrëveshjet përfshijnë Projekti për Zhvillimin e Sektorit Financiar (FSDP) me vlerë 50 milionë euro dhe Projekti për Lehtësimin e Tregtisë dhe Transportit në Ballkanin Perëndimor 2.0 (TTFP 2.0), i cili përbëhet nga 35 milionë euro kredi dhe 12 milionë euro grant. Këto projekte mbështesin reforma strukturore dhe investime strategjike në përputhje me standardet e Bashkimit Evropian.
Projekti FSDP do të mbështesë themelimin dhe funksionalizimin e Bankës Zhvillimore, kapitalizimin e institucioneve kyçe financiare, zgjerimin e instrumenteve të garancisë kreditore për bizneset, si dhe zhvillimin e infrastrukturës moderne të pagesave përmes sistemit të pagesave të shpejta.
Ndërkaq, Projekti TTFP 2.0 synon përmirësimin e infrastrukturës dhe procedurave në pikat kufitare, digjitalizimin e proceseve tregtare dhe rritjen e konkurrueshmërisë së tregut, duke afruar Kosovën me rrjetet dhe standardet evropiane.
Ministri i Financave, Hekuran Murati, theksoi se këto marrëveshje përbëjnë hapa të rëndësishëm drejt forcimit të stabilitetit financiar dhe zhvillimit ekonomik. Ato përmirësojnë qasjen në financa për bizneset dhe rrisin efikasitetin e tregtisë, duke kontribuar në modernizimin e ekonomisë.
Xiaoqing Yu, përfaqësuese e Bankës Botërore, falënderoi ministrin Murati për bashkëpunimin efektiv, shprehu optimizëm për zbatimin në kohë të projekteve dhe riafirmoi angazhimin e bankës për thellimin e bashkëpunimit në nismat e ardhshme.