Sot, Kosova zhvillon zgjedhjet e 11-ta parlamentare që nga përfundimi i luftës, një proces që vjen si pasojë e ngërçit institucional pas zgjedhjeve të datës 9 shkurt dhe 28 dhjetor 2025. Pas vendimit të Gjykatës Kushtetuese, i cili çoi në shpërndarjen e Kuvendit më 28 prill, ushtruesja e detyrës së presidentit, Albulena Haxhiu, shpalli zgjedhjet e parakohshme.
Në garë marrin pjesë 22 parti politike dhe 3 koalicione parazgjedhore. Lëvizja Vetëvendosje, e udhëhequr nga kryeministri në detyrë Albin Kurti, kandidon në koalicion me partitë Guxo, Alternativa dhe Partia Shqiptare Demokristiane e Kosovës. Ndërkohë, Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK) garojnë të vetme. Në listën e kandidatëve të LDK-së figuron edhe Vjosa Osmani.
Kryeministri në detyrë Albin Kurti e ka cilësuar shpërndarjen e legjislaturës si “mjerim politik”, të shkaktuar nga partitë e atëhershme në opozitë, të cilat i akuzoi për bojkotim të qëllimshëm të seancave për zgjedhjen e presidentit. Nga ana tjetër, vëzhguesit politikë vlerësojnë se kriza institucionale rrjedh nga ambicia për kontroll të pushtetit dhe mungesa e gatishmërisë për kompromis.