Një muaj pas zgjedhjeve të jashtëzakonshme parlamentare në Kosovë, skena politike mbetet e bllokuar. Pavarësisht përfundimit të numërimit të votave, Komisioni Qendror i Zgjedhjeve (KQZ) nuk i ka certifikuar ende rezultatet përfundimtare, pasi Gjykata Supreme është në shqyrtim të disa ankesave lidhur me procesin zgjedhor.
Çështja e zgjedhjes së presidentit, e cila ishte shkaku kryesor i shkuarjes në zgjedhje, mbetet ende pa një zgjidhje. Asnjë subjekt politik nuk disponon numrat e nevojshëm për ta zhbllokuar situatën i vetëm, ndërsa dialogu ndërpartiak nuk ka nisur ende me takime zyrtare.
Në një deklaratë për Radion Evropa e Lirë, përfaqësuesja e Lëvizjes Vetëvendosje, Arbërie Nagavci, theksoi se partia e saj i ka siguruar votat për formimin e qeverisë. Sipas saj, prioriteti do të jetë konstituimi i Kuvendit dhe votimi i qeverisë, ndërsa për zgjedhjen e presidentit do të kërkohet konsensus me partitë e tjera brenda afateve kushtetuese.
Ky qëndrim është kundërshtuar nga opozita. Deputeti i zgjedhur i Partisë Demokratike të Kosovës (PDK), Artan Behrami, e cilësoi këtë qasje si një formulë që rrezikon ta çojë vendin sërish në zgjedhje, duke u referuar përvojave të kaluara.
Analisti politik Arbnor Sadiku, në një prononcim për KTV, theksoi se zgjidhja më e mirë do të ishte krijimi i një qeverie nga Lëvizja Vetëvendosje në bashkëpunim me ndonjërën nga partitë opozitare dhe minoritetet. Sadiku nënvizoi se fituesi i zgjedhjeve mban barrën kryesore të përgjegjësisë dhe duhet të tregojë gatishmëri për lëshime politike, në të kundërt vendi do t'i ketë më afër zgjedhjet e ardhshme parlamentare.