Duke filluar nga data 1 qershor 2026, Administrata Tatimore e Kosovës (ATK) ka vënë në zbatim vendimin që kufizon përdorimin e parasë së gatshme në transaksionet tregtare dhe financiare. Sipas njoftimit zyrtar, pagesat me vlerë mbi 2,000 euro ndërmjet bizneseve dhe individëve nuk lejohen më të kryhen me para të gatshme.
Të gjitha transaksionet që e tejkalojnë këtë limit duhet të realizohen detyrimisht përmes sistemit bankar ose formave të tjera elektronike të pagesës. ATK ka theksuar se ky vendim është ndërmarrë në përputhje me legjislacionin në fuqi, me qëllim formalizimin e pagesave dhe reduktimin e përdorimit të parasë së gatshme në transaksionet me vlera të larta.
Nëpërmjet një komunikate për publikun, institucioni u ka bërë thirrje qytetarëve dhe subjekteve afariste që të respektojnë këtë kufizim ligjor, duke paralajmëruar se moszbatimi i kësaj mase do të sjellë ndëshkime dhe gjoba për palët përgjegjëse.
Përditësime
Banka Qendrore e Kosovës (BQK) vlerëson se kufizimi i transaksioneve me para të gatshme mbi 2,000 euro do të ndihmojë në reduktimin e ekonomisë joformale, e cila sipas Institutit Riinvest përllogaritet në 30-35% të Prodhimit të Brendshëm Bruto (PBB). Megjithatë, ekspertët e Riinvest theksojnë se mungesa e besimit në sistemin bankar dhe niveli i ulët i edukimit financiar mbeten pengesat kryesore për kalimin drejt pagesave digjitale.
Tregu bankar në Kosovë po zgjeron shërbimet digjitale, në përputhje me kufizimet e reja që ndalojnë transaksionet me para të gatshme mbi 2,000 euro. Aktualisht, 10 banka komerciale mbështesin sistemin e pagesave përmes:
- 1.4 milionë kartelave të debitit dhe 195 mijë kartelave të kreditit aktive në vitin 2024.
- 635 bankomatëve të instaluar në të gjithë territorin për shërbimet e tërheqjes.
Ish-drejtori i Administratës Tatimore të Kosovës (ATK), Ilir Murtezi, ka kritikuar institucionet për vonesën në informimin e qytetarëve lidhur me kufizimin e pagesave me para të gatshme mbi 2000 euro. Murtezi vuri në dukje se vendimi ishte nxjerrë më 27 prill, ndërsa njoftimi publik u bë pak ditë para hyrjes në fuqi. Ndërkohë, njohësi i çështjeve tatimore, Sakip Imeri, ka vlerësuar se ky vendim është në përputhje të plotë me legjislacionin në fuqi.