Një orë pune në sektorët e prodhimit dhe të shërbimeve në Gjermani kushtoi mesatarisht 45 euro në vitin 2025, sipas Zyrës Federale të Statistikave. Krahasuar me një vit më parë, kostot e punës u rritën me 3,6 për qind, më pak se mesatarja e Bashkimit Evropian, prej 4,1 për qind.
Krahasuar me mesataren e BE-së, prej 34,90 eurosh për orë, kompanitë në Gjermani paguan 29 për qind më shumë. Kjo e rendit vendin ndër shtetet evropiane me kostot më të larta të punës. Në vitin 2025, vetëm katër vende regjistruan kosto më të larta: Luksemburgu, me 56,80 euro; Danimarka, me 51,70 euro; Holanda, me 47,90 euro; dhe Austria, me 46,30 euro për orë.
Kostot e punës përbëhen nga pagat bruto dhe kostot shtesë të pagave, përfshirë kontributet e punëdhënësit për sigurimet shoqërore dhe shpenzimet për trajnim. Pagat bruto përfshijnë pagesën për orët e punuara, bonuset, planet e kursimeve të punonjësve dhe kompensimin për ditët e papunuara, si ditët e pushimit.
Rritja më e madhe e kostove të punës në vitin 2025 u regjistrua në Bullgari, me 13,1 për qind. Pas saj renditen Kroacia, me 11,6 për qind, dhe Polonia, me 10,5 për qind. Rritjet më të ulëta u shënuan në Francë, me 2 për qind; Danimarkë, me 3 për qind; dhe Itali, me 3,2 për qind. Në Maltë, kostot e punës ranë lehtë.
Që nga viti 2020, kostoja për një orë pune në Gjermani është rritur me 22,3 për qind, njoftoi Zyra Federale e Statistikave. Rritja më e madhe, prej 30 për qind, u regjistrua në sektorin e hotelerisë dhe gastronomisë. Megjithatë, hendeku me mesataren e BE-së ka ndryshuar shumë pak.
Sipas Institutit ifo, për shkak të krizës globale, kompanitë në Gjermani planifikojnë të shkurtojnë më shumë vende pune. Treguesi për situatën në tregun e punës është përkeqësuar në sektorin e prodhimit, si dhe në tregtinë me shumicë dhe pakicë.