Paneli Vlerësues i Këshillit Prokurorial të Kosovës (KPK), i kryesuar nga Arian Gashi dhe me anëtarë Elza Bajrami-Kastrati e Visar Krasniqi, ka zhvilluar mbledhjen për shqyrtimin e dokumentacionit të aplikantëve për pozitën e Kryeprokurorit të Shtetit. Pas verifikimit, paneli konfirmoi se të gjithë kandidatët i kanë plotësuar kushtet për të vazhduar në fazat e mëtejme të procesit.
Kandidatët që hyjnë në garë janë:
• Atdhe Dema, prokuror në Prokurorinë Speciale të Kosovës;
• Naim Abazi, prokuror në Prokurorinë Speciale të Kosovës;
• Rafet Halimi, prokuror në Prokurorinë Speciale të Kosovës;
• Shqipdon Fazliu, prokuror në Zyrën e Kryeprokurorit të Shtetit;
• Zejnullah Gashi, Kryeprokuror i Prokurorisë Themelore në Prishtinë.
Kryesuesi i KPK-së, Arian Gashi, u shpreh se procesi i vlerësimit po zhvillohet në përputhje me transparencën dhe legjislacionin në fuqi. Shqyrtimi i dosjeve u zhvillua pa praninë e mediave, për shkak të natyrës konfidenciale të dokumentacionit.
Pozita e Kryeprokurorit të Shtetit ka mbetur vakante prej afro tre vitesh. Në procesin e mëparshëm, kandidati i propozuar Blerim Isufaj nuk u dekretua nga Presidentja e Republikës së Kosovës, Vjosa Osmani, e cila argumentoi se pati shkelje procedurale. Që nga ajo kohë, sistemi prokurorial ka funksionuar me ushtrues detyre. Instituti i Kosovës për Drejtësi (IKD) ka kërkuar që procesi aktual të zhvillohet në përputhje të plotë me rregulloret dhe ligjet përkatëse.