Këshilli Prokurorial i Kosovës (KPK) ka bërë të ditur orarin për intervistimin e kandidatëve për pozitën e Kryeprokurorit të Shtetit. Procesi do të zhvillohet më 1 korrik 2026 në ambientet e KPK-së, në sallën e takimeve në katin e gjashtë, bazuar në Rregulloren 07/2026 për ndryshimin dhe plotësimin e Rregullores 07/2024.
Sipas agjendës së publikuar, hartimi i pyetjeve nga Paneli Vlerësues do të fillojë në orën 08:00, ndërsa procesi i intervistimit do të nisë në orën 11:00. Në intervalin kohor 12:00–13:00 është parashikuar një pauzë. Renditja e kandidatëve është si vijon:
• Atdhe Dema: ora 11:00
• Naim Abazi: ora 13:00
• Rafet Halimi: ora 14:15
• Shqipdon Fazliu: ora 15:30
• Zejnulla Gashi: ora 16:45
Institucioni ka njoftuar se përfaqësuesit e organizatave apo palët e tjera të interesuara që dëshirojnë të monitorojnë procesin, duhet të konfirmojnë pjesëmarrjen e tyre pranë Zyrës për Komunikim Publik përmes adresës elektronike [email protected] jo më vonë se data 26 qershor 2026. Ky njoftim është bërë për shkak të kapaciteteve të kufizuara të sallës.
Përditësime
Këshilli Prokurorial i Kosovës (KPK) ka bërë të ditur përbërjen e Panelit Vlerësues për pozitën e Kryeprokurorit të Shtetit, proces i hapur zyrtarisht më 18 maj 2026. Paneli do të udhëhiqet nga Arian Gashi, me anëtarë Elza Bajrami-Kastrati dhe Visar Krasniqi. Ndërkohë, në Gjykatën e Apelit vazhdon të jetë në shqyrtim kërkesa për masë sigurie e parashtruar nga kandidati Blerim Isufaj, pas refuzimit të padisë së tij nga Gjykata Administrative.