Në mbledhjen e mbajtur të premten, Komisioni Qendror i Zgjedhjeve (KQZ) miratoi akreditimin e 761 vëzhguesve për monitorimin e zgjedhjeve për Kuvendin e Republikës së Kosovës, të planifikuara për datën 7 qershor 2026.
Drejtori i Zyrës për Regjistrim, Certifikim dhe Kontroll Financiar të Subjekteve Politike, Besnik Buzhala, njoftoi se dy organizata nuk kanë plotësuar kriteret ligjore për të qenë pjesë e këtij procesi. Organizata Advocacy Center for Democratic Culture u refuzua me arsyetimin se fushëveprimtaria e saj nuk ndërlidhet me proceset zgjedhore ose mbrojtjen e të drejtave të njeriut, duke mos qenë në përputhje me nenin 54 të Ligjit për Zgjedhjet e Përgjithshme.
Ndërkaq, organizata Odbor za kontrolu i opservaciju nuk u akreditua pasi në dokumentacionin e saj zyrtar i është referuar shtetit me terminologjinë “Kosovë dhe Metohi”. Sipas KQZ-së, ky formulim bie ndesh me rendin kushtetues dhe juridik të Republikës së Kosovës. Ky vendim u mor me 9 vota pro dhe një abstenim.
Në të njëjtën mbledhje, KQZ mori vendim për pezullimin e partisë politike Eko-Lëvizja e Gjelbër (ELGJ). Shkak për këtë vendim u bë mosmbajtja e kuvendit zgjedhor brenda afatit të paraparë dhe mungesa e njoftimit përkatës pranë institucionit. Subjektit në fjalë i është dhënë një afat prej 45 ditësh për të mbajtur kuvendin, në të kundërt, partia do të çregjistrohet. Vendimi u miratua me votë unanime, pa vota kundër dhe pa abstenime.
Përditësime
Komisioni Qendror i Zgjedhjeve (KQZ) ka emëruar 14,000 anëtarë për menaxhimin e vendvotimeve të rregullta, atyre me kusht dhe të atyre në përfaqësitë diplomatike. Njëkohësisht, institucioni ka akredituar 761 vëzhgues nga 29 organizata që plotësuan kriteret ligjore, ndërsa ka refuzuar kërkesën e dy organizatave të tjera.