Sot, në orën 11:00, Komisioni Qendror i Zgjedhjeve mban mbledhjen për certifikimin e rezultateve përfundimtare të zgjedhjeve të parakohshme për Kuvendin e Republikës së Kosovës. Procesi zhvillohet një muaj pas mbajtjes së votimeve më 7 qershor, pas shqyrtimit dhe vendosjes nga Gjykata Supreme mbi ankesat e paraqitura.
Zëdhënësi i KQZ-së, Valmir Elezi, konfirmoi se mbledhja është caktuar pas vendimit të gjykatës për pesë ankesat e ushtruara lidhur me procesin zgjedhor. Ky veprim shënon përmbylljen zyrtare të procesit zgjedhor dhe krijon bazën ligjore për konstituimin e legjislaturës së re dhe formimin e institucioneve të qeverisjes.
Rezultatet e subjekteve politike, të shpallura më herët nga KQZ-ja, janë:
• VV: 47.13%
• PDK: 19.44%
• LDK: 16.69%
• AAK: 6.74%
Pas certifikimit, partitë politike do të mund të ndërmarrin hapat e nevojshëm institucionalë për funksionalizimin e Kuvendit.
Përditësime
Gjykata Supreme ka hedhur poshtë si të pabazuara pesë ankesat e parashtruara nga Lista Serbe, Emilija Rexhepi, Bekim Haxhiu dhe Qëndrim Kryeziu. Me këtë vendim, KQZ-ja pritet të certifikojë sot rezultatet përfundimtare të zgjedhjeve të 7 qershorit. Sipas të dhënave zyrtare, Lista Serbe ka siguruar 5.40% të votave, ndërsa Aleanca për Ardhmërinë e Kosovës (AAK) ka konfirmuar 7 mandate në Kuvend.
Komisioni Qendror i Zgjedhjeve (KQZ) certifikoi sot rezultatet përfundimtare të zgjedhjeve të 7 qershorit. Mandatet në Kuvend janë ndarë si vijon: Lëvizja Vetëvendosje (VV) me 53 ulëse, Partia Demokratike e Kosovës (PDK) me 22 ulëse, Lidhja Demokratike e Kosovës (LDK) me 18 ulëse, Lista Serbe me 9 ulëse dhe Aleanca për Ardhmërinë e Kosovës (AAK) me 7 ulëse. Institucionet kanë afat ligjor prej 30 ditësh për konstituimin e Kuvendit. Ushtruesja e detyrës së presidentit, Albulena Haxhiu, pritet të thërrasë seancën konstituive dhe të nominojë mandatarin për formimin e qeverisë.