KQZ certifikon sot rezultatet e zgjedhjeve parlamentare në Kosovë

Komisioni Qendror i Zgjedhjeve (KQZ) në Kosovë mblidhet të hënën në orën 18:00 për të certifikuar rezultatet përfundimtare të zgjedhjeve të parakohshme parlamentare të 28 dhjetorit, konfirmoi zëdhënësi i institucionit, Valmir Elezi.

Certifikimi vjen pas përfundimit të afateve për ankesa nga partitë dhe kandidatët te Paneli Zgjedhor për Ankesa dhe Parashtresa, si dhe te Gjykata Supreme.

Procesi pasoi rinumërimin e plotë të votave të rregullta për shkak të mospërputhjeve në votat e kandidatëve për deputetë. Votat për parti nuk u cenuan.

Hetimet për manipulime

Dhjetëra persona janë dërguar në paraburgim, ndërsa qindra të tjerë janë intervistuar nën dyshime për manipulim votash. Proceset hetimore dhe gjyqësore pritet të vazhdojnë. Prokuroria e Shtetit ka paralajmëruar se objekt i hetimeve mund të jenë edhe kandidatët për deputetë.

Rezultatet përfundimtare

Sipas shpalljes së KQZ-së më 31 janar, partitë kanë siguruar këto ulëse në Kuvend:
• Lëvizja Vetëvendosje: 51.10% të votave, 57 ulëse.
• Partia Demokratike e Kosovës: 20.19%, 22 ulëse.
• Lidhja Demokratike e Kosovës: 13.24%, 15 ulëse.
• Aleanca për Ardhmërinë e Kosovës: 5.50%, 6 ulëse.

Nga ulëset e rezervuara për minoritetin serb, Lista Serbe ka fituar 9 ulëse, ndërsa Partia për Liri, Drejtësi dhe Mbijetesë një ulëse.

Hapat e radhës

Sipas Ligjit për Zgjedhjet e Përgjithshme, pas certifikimit mbahet seanca konstituive e Kuvendit brenda 30 ditësh, e thirrur nga presidentja Vjosa Osmani. Nëse ajo nuk e thërret, Kuvendi mblidhet vetë në ditën e 30-të, sipas Rregullores së Punës së Kuvendit.

Kreu i Lëvizjes Vetëvendosje, Albin Kurti, ka thënë se ka biseduar me Osmanin për çështjen e presidentit dhe se duhet një raport i ri me partitë e opozitës për kreun e ri të shtetit.

---