Komisioni Qendror i Zgjedhjeve (KQZ) ka hequr masën e pezullimit ndaj Aleancës Kosova e Re (AKR), duke i hapur rrugë rikthimit në aktivitetin politik.
Vendimi për pezullim ishte marrë më 12 mars nga Zyra për Regjistrim, Certifikim dhe Kontrollin Financiar të Subjekteve Politike. Sipas njoftimit të AKR-së, masa u shfuqizua pasi partia përmbushi të gjitha obligimet ligjore, duke respektuar afatin 45-ditor.
Gjatë këtij afati, AKR mbajti Kuvendin Zgjedhor dhe plotësoi kërkesat procedurale të autoriteteve përkatëse. Në Kuvendin Zgjedhor, të mbajtur dy javë më parë, Emir Abrashi u zgjodh kryetar i partisë.
AKR e konsideron këtë zhvillim një hap drejt konsolidimit institucional dhe politik, me përkushtim për transparencë, respektim të ligjit dhe përfaqësim dinjitoz të qytetarëve të Kosovës. Strukturat e reja do të angazhohen në fuqizimin e partisë, rritjen e besimit qytetar dhe përgatitjen për sfidat politike të ardhshme.
AKR falënderon anëtarët dhe mbështetësit për durimin gjatë periudhës së pezullimit. Partia u themelua nga Behgjet Pacolli.